TAROMBO NI SITOGA NAIPOSPOS

Ia Si Raja Naipoispos i, ima anak ni Tuan Sorbadibanua tubu ni boru Sibasopaet, ualu hian do nasida sa-Ama, alai anggo sa-Ina tolu halak do, ima Sitoga Sihombing, Sitoga Naipospos dohot Siraja Sobu. Ia na sa-Ama nari ima Sibagot ni Pohan, Silahi Sabungan, Sipaettua, Siraja Oloan dohot Siraja Hutalima ima tubu ni boru Lontung didok.

Ia Tuan Sorbadibanua i parjuji do didok barita i nama angka na husurat dison. Ianggo tuanboruna boru Sibasopaet i na hol do ndang marnida dakdanak, di sada borngin na marnipi do boru Sibasopaet on: Ro ma ninna sada boru Natuatua na mandok hata tu ibana “unang sai marsak ho! Ala na so adong tumubuhon jolma, alai dapot ho ma sahalion pira ni Pidong Talaktak, alai pasoding ma i manang na tudia lomom jala dung 7 borngin lelengna dulo ma muse, ai gabe jolma ma i, Alai ianggo abitmu bahen ma songon parabiton ni naung gabegabean!, tarsunggul ma ibana, dibahen ma antong marsogotnai songon2i, lam leleng lam ditambai ma patureture abitna i, alai ianggo diida Tuan Sorbadibanua, ndang apala dibaen paheannai huhut ala leleng diparjujian do Tuan Sorbadibanua, ndang pola maol dijaga rohana i, dung pa-sia-bulanhon sai songon2i dibahen. Di nasadari laho mulak ibana sian parsobanan diida ma tutu sada asar ni Talaktak jala tolu pira dibagasan. Las ma rohana ai ndang lupa ibana di nipinai, nunga tung sai dipaingotingot i dibagasan na 9 bulan i.
Dung sahat ibana ro di jabu dibaen ma (dibunihon) ma pira ni pidong Talaktak i, sada tu Pangumbani, sada tu Tomboman ni jabu i, jala nasadanari dibaen ma i tu Sobuon, alai sai tardipatingkirtingkir ibana do i. Jadi marsogot na i mamintor diida ibana ma adong Sijombing meat tu pira ni Pidong na di Tomboman i, diida muse ma pira na di Pangumbari disonggopi ipos alai anggo na di Sobuon i ndang adong na ro tu si huhut ala hukkup do i, sai songon2i ma lelengna 7 borngin, jadi pa-pitu-arihon ala naung sai tu si rohana huhut diida ma nunga gabe jolma tolunsa, laos dibuat ma jala di didi jadi laos tangis be ma antong. Songon na so siat do nian barita on tu roha, nang tu roha ni na manjaha dohot na umbegesa.
Dungi disuru boru Sibasopaet do i ra songon naung husurathon di jolo i, ianggo angka natuatua naparjolo sian ahu mandok sai boru Sibasopaet do. Disuru ma naposona (naposo pangurupi do nanidokna), manjou Tuan Sorbadibanua tu parjujian jala paboahon naung tubu anakna tolu, dung sahat namanjou didok ma: “Rajanami nunga tubu anakmuna, ipe muli ma jolo Rajai”. Muruk do Raja i mangalusi jala didok: “Naoto do ho hape? Ho ma na lumoak”. Dungi dialusi Naposoi ma muse: “Tutu do Rajanami ndang naoto ahu, alai tung na tutu situtu do, nunga tubu Anak ni inanta Soripada Sibasopaet tolu nangkining”. Didok Tuan Sorbadibanua i do muse: “Ah ndang naoto ahu, so huboto haroan nanaeng ro di ahu, alai laos dohot ma na di parjujian i manjujui asa muli Tuan Sorbadibanua i.
Tung dokdok do nian rohana laho hehe dohot mardalan ai ndang dihaporseai jala autbeha maila ibana, hape ditoru dope ibana nunga dibege ngaokngaok posoposoi, las ma antong rohana, alai di nasobinege ni manang ise dirohana ingkon sungkunonna tuanboruna (boru Sibasopaet i).
Dinasahali ditangkasi ma boru Sibasopaet i taringot tu pangalahona manang na songondia do. Jadi dipaboa ma sude nipinai dohot pambahenanna diparabitonna salelengnai. Jadi marhite sian i songonna ditoishori roha ni Tuan Sorbadibanua on ma anakna si tolu halak i, jala marhite sian boaboa ni tuanboruna i ma dibaen goarna: Na niinganan ni Sijombing i SIJOMBING, na niinganan ni Ipos i, SIIPOS jala na di Sobuon i SISOBUON., laos tarida ma antong nahurang maol (lea) do dirohana tubu ni boru Sibasopaet i. Asa na dipadenggan halak nama dipudian ni ari goar i, ima na gabe torus tu saonari: Si Toga SIHOMBING, Si Toga NAIPOSPOS dohot Si Raja SOBU. Nang pe naung balga anakna natolui, ianggo dibagasan roha ni Tuan Sorbadibanua ndang hasea nasida, gariada tahe sai naeng na hurang tibu mate tolunsa, jala dietong ibana do i haleaon di ibana molo laos mangolu.
Jadi di nasadari dipatulbu-tulbu ibana ma anakna na 8 halak i, ima tubu ni boru Lontung na lima, maralohon tubu ni boru Sibasopaet si tobu halak i ima di tano Balige, jadi lam somal ma antong songon2i dipatulbutulbu dohot manang marpantom dibaen dirimpu nasida do holan na sigajaraja di nasida antong ai ndang apala hea didok ama nasida i tu nasida tubu manang aha nasida, alai ianggo roha ni Tuan Sorbanibanua i sai naeng ma mate halak na tolu i.
Jadi di na sadari muse tar mareak botari, didokkon ma muse nasida marpantom sanggar, alai nunga dirade hian sanggar baen pantom nasida, disuru ma tolu halak tubu ni boru Lontung dijolo alo ni si tolu halak tubu ni boru Sibasopaet i, jala didok ianggo leak taralo tolu do na tolu, nunga rap nabegu nasida, alai molo so taralosa ro ma nadua mangurupi, jala tanda ma naumbegu jala naummalo Si Toga Sihombing, Si Toga Naipospos dohot si Raja Sobu ninna, ianggo di angka ari naung salpu antong sai gumarang do si tolu halak i sian si lima halak nai, dung loja nasida na marpantom i jala hona onjar si tolu halak pinompar ni boru Lontung i disuru ma muse na dua nari jala dilehon ma pantom sanggar naung adong tarugi diujung ni pantom i naung tinajoman, sangkap ni Tuan Sorbadibanua i asa hona jala mate si 3 tolu halak pinompar ni boru Sibasopaet i. Torus ma antong dipantomhon pantom naung adong tarugi naung tinajoman i tu si tolu halak i, alai ala na ummalo i si tolu halak sian na lima, ba ditangkup ma pantom na adong tarugi i jala dipantomhon ma i mulak tu si lima halak i, jadi hona ma antong si Raja Huta Lima jala laos mate. Alai adong do na mandok ndang tutu mate si Raja Hutalima na jalang do jala di Karo do didok, ndang tartontuhon ahu dison.
Dung mate didok si Raja Hutalima i, disuru Tuan Sorbadibanuai ma maradian, ai autboha didok rohana hona siopat halaknai i. Laos ditangkasi si tolu halak on ma antong angka pantom na adong dope ditangan nasida i, ba diida nasida ma nunga gantung ditangan nasida pantom sanggar naung martarugi, Jadi muli ma nasida laos dipaboa ma tu inana boru Sibasopaet taringot tu namasa i. Jadi dipaingot ma anakna na tolu halak i asa tardijaga roha nasida be roha ni Tuan Sorbadibanua i nanaeng mamusa nasida hian. Jadi olat ni i lam mabiar ma nasida mida amana i jala lam ditoishon rohanasida ma antong.
Ndang pola sadia hinata si tolu halak i nang boru Sibasopaet pe, ai molo adong tois ro do jais jala molo soadong holong, holang do nang holong hian. Nian ingkon haholongan ni ama do anakhonna jala ingkon roha pangoluhon di anakna, ipe asa dihaholongi ianakhon na i amana, nang tu halak na asing tahe. Adong do hata na mandok: Holong do mangalap holong, jala jais mangalap haleaon.
Dungi dung songon i pangalaho ni namasa i, bungkas ma sian Balige boru Sibasopaet rap dohot anakna na tolu halak i tu Uluan, alai ro ma Silahisabungan tu tano Sigumpar, jadi dung diboto boru Sibasopaet naung jonok be inganan nasida i, ditahi ma muse bungkas tu balik ni dolok Tolong, jadi saut ma nasida bungkas jala maringanan di Tanggabatu, alai tong dope dihilala majonokhu tu tano Balige, ndang pola lebeng nasida disi bungkas ma muse nasida tu Pariksabungan. Adong do na mandok di Pariksabungan i do na martulbu i, laos ido umbahen na margoar Pariksabungan, asa disi do dipasabung Tuan Sorbadibanua anakna na tolu halak i, asa ndang tartontuhon i. Sian Pariksabungan on ma marserak si tolu halak i, ra dung mambuat boru ma nasida be, si Toga Sihombing tu Banualuhu Butar, jala si Toga Naipospos tu tano Bahal Batu, ia si Raja Sobu tu si Hujur ma didok. Sian inganan ima muse marserak angka marga i. Ia si Toga Naipospos munsat ma muse tu Dolok IMUN.
Ia si Toga Naipospos namarsiduadua do ibana, jala boru Pasanibu do duansa. Parjobo dialap ma naumpompar Sibagariang, Hutauruk, Simanungkalit dohot Situmeang, ala tar-hol ma jolo jadi ndang sonang rohana alani naso mamintor adong i ianakhon di nasida jala nunga songon na ngolngolan rohana, ala ni i dialap ma muse laos tong boru Pasanibu. Dung ro (dialap boru Pasanibu na paduahon i), ndang sadia leleng mamintor adong ma na tar-hol di boru Pasaribu na parjobo nialapna i, jala mamintor tubu ma Donda Hopol (Sibagariang), Dung tubutubuan boru Pasaribu na parjoloi (namanubuhon Sibagariang i); tubutubuan muse ma boru Pasaribu na parpudi nialap na i, tubu ma si Marbun, Dung i muse ditubuhon boru Pasanibu naparjolo i ma Donda Ujung (Hutauruk), tubu muse ma ihut tusi Ujung Tinumpak (Simanungkalit) dohot Jamitamangaraja (Situmeang), alai ianggo boru Pasaribu naparpudi i namanubuhon Marbun, holan sada nama ditubuhon boruboru. Molo pinarateatehon hatorangan on, jala molo songon i do sintong na, tangkas ma na 5 (lima) do baoa anak ni Si Toga Naipospos, ima: 1. Sibagariang, 2. Hutauruk, 3. Simanungkalit 4. Situmeang, 5. Marbun.
Adong do na mandok jala hira nunga dioloi pinompar ni si Toga Naipospos na dua do anak ni si Toga Naipospos ima: 1. Si Toga Sipoholon, 2. Si Toga Marbun, alai anggo hatorangan na manontuhon ndang apala adong, lobi ala margoar bius di Sipoholon. Nian na di taon 1921 di na ro Asisten Demang dohot Demang tu luat Huta Raja mangido dohot mambahen Tarombo, laho mamillit (mambahen verkeising Kepala Negeri di Huta Raja), laos di tingki i torop do pe angka natuatua sian marga Sibagariang, Hutauruk, Simanungkalit, Situmeang, nang Marbun pe, adong na marumur 70-90 taon jala laos ro tu punguan i, mardomu ringgas ni roha nasida be ro, ala na sohea pola ro Pamarenta manaringoti tarombo na songon i. Alai ianggo umurhu 27 taon do pe tingki i. Jadi sude Natuatua sian marga na lima (5) i mandok: Tung na 5 (lima) do anak ni si Toga Naipospos. Didok Ass Demang mangihuthon tarombo Sipoholon dua do anak ni si Toga Naipoispos, ima si Toga Sipoholon dohot si Toga Marbun, ala naung jumolo huhut dibaen tarombo di Sipoholon sian di Huta Raja.
Sude do nian angka Natuatua na di punguan i mangalo asa unang songon i dibahen (disurathon) nasida, alai alus ni Demang i, dipudi pe i pinatingkos, alai songon na di Sipoholon i majolo’ binahen, jadi songon i ma saut disurathon di taon 1923.
Dung sae tarombo i, ro ma muse pangidoan ni Pamarenta i, asa marpungu sude Kapala Negeri na masuk tu Sipoholon ima marga Naipospos. Jadi di punguan I, di na ro i Controleur dohot Demang, disungkun ma muse taringot tu tarombo ni anak ni Si Toga Naipoispos i, manang dia na tutu, tarombo na binahen ni Sipoholon do nanidok ni Huta Raja. Hupatorang do nian songon na di hatorangan on, jala tambana hudok: “Aut na tutu adong si Toga Sipoholon anak ni si Toga Naipoispos i, jala anak ni ima na 4 (opat) halak: 1.Sibagariang, 2. Hutauruk, 3. Simanungkalit, 4. Situmeang, naingkon jolo margahononna ma ima marga Si Toga Sipoholon, alai ala so tutu adong i, ba dang adong marga Sipoholon”. Hatorangan paduahon muse: “Ala ni na so taralo si Toga Marbun do na 4 (opat) tubu ni na parjolo, umbahen na bungkas nasida, tingki i ndang dope marhasohotan ibana, ai inanta i rap dohot sada ibotona do dongan na (holan nasida natolu do)”.
Nahansit do ditaon dibaen Sihagariang, Hutauruk, Simanungkalit dohot Situmeang, na marhorbo jolo do nasida: di na opat (4) ma horbo jolo jala di na sada (1) horbo pudi. Ia tingki mangula, maninggala manang manisir, ndang diloas Sibagariang i augaanna rungkung ni horbo i, dipudi do disuru, ndang boi antong, jadi sundat ma maninggala manang manisir. Songoni nang laho mamoro, ndang diloas Marbun i mamoro dung turun dionsop horbo i ma mulamula, alai didok sian na 4 halak i do: “Manusu dope i anon, parpudi i pe di ho poro ninna”, tutu manusu dope nian alai ndatung adong be ianggo susu holan asal margubogubo sambing nama. Suang songon i do nang napu2 ni horbo i sai adong do na parpudi, alai tung apala saotik do, ido diloas Sibagariang dohot dongan na i buaton na; tung bari do tahe, dung do nasida marbagi di horboi, alai digulangi naopat halak i do ianggo horbo bagian ni Marbun i, laos i do umbahen margoar adong panggulangan di tobing Huta Raja.
Tarsongoni ma hu patorang nian taringot tu paranahon ni Si Toga Naipospos i, jala ndang adong hatorangan dilehon nasida, lobi sian goar bius Sipohobon, marhitehon sian goar ni ompu do i umbahen na gabe Sipohobon didok nasida. Nang taringot tusi hualusi do nian, ai ningku do: “Molo songon i nian, boasa so dohot Huta Raja dihangkam? Ai sai ingkon Sipohobon Huta Raja ma nian goar ni nang Sipohobon on, ai tangkas do na masa binahen ni Sibagariang – Hutauruk dohot nadua nari na tu Marbun i di Huta Raja jala ndang di Sipohobon an”. Alus nasida; “Sipohobon do nang Huta Raja”. Alushu muse di pamarenta on do (jala dung pe tingkion Huta Raja Sipoholon. Ndang holan i, nang Pagar Batu digoari do Sipoholon, Rura Julu dohot na asing I; “Alai ianggo apala na tangkas situtu Sipohobon holan na masuk Rura Silindung on do”. Ndang adong dilean nasida hatorangan naasing manang nagumanjang. Alai ala diida pamarenta holan ahu (sahalak ) do alo ni lima bius (7) halak. Jadi didok Demang i ma: “Ianggo hatorangan i tangkas do tumorang na pinaboa ni Kepala Negeri Hutaraja, alai ala tumorop harnu alona, songon i ma i jolo, ninna”.
Asa on pe nang taringot tuson, umbahen na husurathon angka i, ndang na manontuhon naung tangkas Situtu angka i, alai aut beha muse adong ringkot ni na naeng pahothon manang padengganhon di ari parpudi, ido alana umbahen hupatorang angka naung hutaringoti hami na uju i dison, jala molo songon na gabe turitrunian na hu surat i, ndang na pola seang i.
Barita na asing taringot tu partubu ni Si Toga Naipospos dohot na dua nai Si Toga Sihombing dohot Si Raja Sobu.
Nunga hu surathon nian, saragam barita taringot tu partubu ni si Toga Sihombing, Si Toga Naipospos dohot si Raja Sobu. Alai adong do pe na mandok songon on: Ia boru Sibasopaet pandurung dengke do di topi2 ni Tao Toba (Balige ma ra), ditingki na nidurunghon na hirang na i dapotsa ma sada tunggar2, disi diida ibana mamintor didanggur ma i alai tong do tu Tao i, mardalan ma ibana muse jala didurunghon hirangna i, hape nunga dibagasan muse tunggar2 nangkiningan i, diulahi muse ma mandanggurhon tu Tao i jala munsat ma ibana tu na asing, alai nunga diida ibana ro tunggar2 i mangihuthon ibana.; didurunghon ma muse hirangna i hape nunga dibagasan muse ‘tunggar2i, jadi manginongi ma rohana ai nunga tung halongangan on di rohana. Dungi muli ma ibana laos diboan ma tunggar2i tu huta, dibuat ma tangke laho manaha nian alai ndang boe tahaonna, dung manang na piga hali ditahahon tangke na i ndang olo mabola, ro ma lali mangareapreap jala hulis2, dungi tarbege ma soara sian lali na hulishulis i songon on: “Hulishulis ndang boe bolaonmu i ianggo holan tangkemi, hulis2 alai molo sambilu dibahen ho has ma i mabola”.
Jadi dung dibege ibana soara ni lali i jala nunga loja ibana na manahahon tangke i, dibuat ma sambilu diseathon ma tu tunggar2i. Jadi mamintor silgang jala bola dua ma jala diida ma dibagasan tolu pira na sabalga ni pira ni Talaktak, dipeakhon /dibuat ma i sada sada tu bona ni urus ni jabuna (tomboman) sada tu Hombingan jala sada Sobuon, ala nunga sai adong halongangan antong di roha ni boru Sibasopaet i, ndang dibolonghon gariada tahe dipadimpan do. Alai dung dibaen na tu tomboman i mamintor ro do ipos tu si, songoni nang na di hombingan i, ro ma si jombing tusi, alai ianggo na di Sobuon i buni do ndang tarida dibahen. ianggo na sinondukna Tuan Sorbadibanua, sai marjuji do ulaonna.
Sai dialathon boru Sibasopaet i do pangalaho ni pira na nibunihon na i. Dung i di papitu arihon diida ma nunga gabe jolma tolutna pira i, dibuat jala dipansisuluhon ma. Jadi disuru ma na paboahon tu Tuan Sorbadibanua paboa naung tubu anakna tolu sian boru Sibasopaet i alai maol do diparhatutu hata ni napaboahon i, jala didok rohana do molo tung tutu adong na songoni, anak ni begu do i ndang anak ni jolma. Diihuthon do na manjou on alai ndang las roha; didok rohana do na jea do i jala haleaon jadi ndang pola sadia diparhamaol rohana nasida na tolu i. Alai lam leleng lam ganda jala lam magodang ma Si Toga Sihombing, Si Toga Naipospos dohot Si Toga Sobu. Na tardos do dohot barita na parjolo i, ianggo na patandahon sogo ni roha ni Tuan Sorbadibanua ima marhitehite na patulbutulbuhon dohot di tingki na marpantom sanggar na martarugi tubu ni boru Lontung. Ndang asa tung dihaporseai manang ise taringot tu nahusurati gariada tahe ra tung na so sintong do songon i hajajadi ni Si Toga Naipospos i, ianggo di rohaku asa boi ma dohonon asa diboto angka na parpudi do, sai adong do barita siringkocringkot.
Ia taringot tu parrohaon ni Sibagariang dohot donganna si Hutauruk, Simanungkalit dohot Situmeang, maradophon Si Marbun tung na hurang situtu do, alai tutu tar sude do na martubu ni imbang na sai marbadai (marhosomi) na laos suan do i tu roha ni ianakhon ni na marimbang i ai sai holan na manggulut di ibana sandiri asa sumurung jala gumodang di dipikiri roha nasida be. Asa tung na so hasea do roha di angka na marimbang jala singotsingot: Unang diulahon baoa na masiduadua, ai na manghorhon bada2 dohot ahut2 tu dirina be do pikkiran ni halak na marimbang jala na gabe dohot angka tubuna be marrohahon jala mangulahon na so ture i pola tahe manghorhon late. Ia si Marbun dung dihilala rohana so taralosa jala so tartaonsa be pambahenan ni Sibagariang dohot na tolu nari, bungkas ma nasida tu Marbun, alai di Pansur Natolu do jolo nasida maradian manang na piga taon (di Silaban rura ma i ) laos di si ma muli ibotona i tu marga Silaban, diboan Si Marbun i do barang parbagian nasida i ima djeret.
Pambahen ni Si Raja Naipospos laho marbagi tu ianakhonna:
Ia tano na gabe bangunan i ma bagian ni anakna na 4 (opat) halak natinggal di Huta Raja, nunga hupaboa angka goar ni ladang i, alai ianggo parbagian di ogung songon on ma jala dohot dope tingki i tahe Si Marbun marbagi, ai andorang so bungkas do pe ibana.
Disada bodari didok Si Naipospos i ma tu anakna na 5(lima) halak i: buat hamu ma jolo ogungta i sian rangkean na i jala palu hamu ma asa hubege jala manang na domu do soarana i bahenon ni hamu na lima. Ndang diboto nasida antong sangkap ni ama nasida i, tung dirimpu nasida do tung hoban na naeng begeon nasida sambing soara ni ogung na i, na arga do ogung ianggo najolo. Jadi dipalui nasida be ma antong jala ia so domu panabu (soara) ni ogung i dipalu manang ise digantihon ma tu na sada, sai songon2i ma jolo diaturhon tu anakna na 5 (lima) halak i paima nunga tung denggan begeonna (domu) soara ni ogung i. Asa dung denggan hadodomu ni soara ni ogung i dibege si Naipospos i didokma tu nasida: “Nunga denggan jala lehet hubege soara ni ogung na pinalu muna i, asa on pe masi tiop di ibana be hamu di naung tiniop jala na pinalu muna be, pauli hamu be ma lao manimpan, ai laos songon i nama parbagina di ganup hamu, alai molo tung masa ulaon horja, ba unang ma so dilean manang ise bagian na di ibana i, ai maol do napadomudomu soara ni ogung na pulik2 bangunan”.
Jadi dioloi nasida be ma antong parbagi ni amana i laos dipasahatma dohot hata pasu2, asa lam gabe jala tu horasna nasida be sude. Asa angka on ma goar2 ni Ogung na jinalo nasida i: Si Donda Hopol ima Ogung Panggora, ia Donda Ujung ima Ogung Pangihut na margoar si Palaka, ia di Ujung Tinumpak ima Doal na margoar Doal si imbo, ia di Jamitamangaraja ima Doal Oloan goarna Doal Sidambirbir, ia di Si Marbun ima Djeret.
Mansai denggan do pambagihon ni Si Naipospos i pusakona tu anakna jala na tau sitiruondo i antong, ai marguru tu nabinotona be dilehon siulaonna be jala na laos jambar. Sintong do asa denggan ulaon ni manang ise ingkon na diboto do mangulahon asa lomo huhut roha ni na marnida manang na umbegesa pe, jala didokkon do pe padomuon nasida ogung i ditingki adong horja asa mamintor uli soara ni ogung i, laos singot2 doi nian asa unang adong na asing2 roha ni manang ise patupahon ulaon halalas ni roha jadi mamintor denggan jala tulus ma tula na denggan hinorhon ni sada ni roha i.
Ia si Naipospos on marujung (mate)ma ibana ditanom di Dobok Imun do didok alai ndang adong tanda2na, dihorjahon do ibana, huroa nunga marpinompari ianakhonna na lima halak i, pitu hali do ibana dihorjahon; tartontuhon (pinarhatutu) do i antong, Alana nunga gabe sombaon ibana mangihuthon panandaon dohot pandohan ni angka jolma najolo. Ingkon pitu hali disantihon dohot horja jolma na mate asa boi gabe sombaon, ianggo holan 5-6 hali dope tung na so boi do gabe sambaon. Hira sude do pinompoar ni Si Naipoispos on mandok naung gabe sombaon Si Naipospos i jala ima na gabe margoar Martua Same. Ninna halak laos maringanan ma i di Aek Rangat na di Sipoholan i.
Ianggo taringot tu na gabe sombaon i Si Naipoispos, nang pe husurathon i dibagasan buku on, ndang na adong pikiranhu asa diharingkothon roha ni na manjaha (naumboto barita on) ulaon siulahononhon na manggondanghon bangke ni ompuna asa gabe sombaon, ai asing do pe na mambahen gondang patuduhon parsangapion sambing di natuatuana so pola adong huhut sangkap asa tung lam marsangap ama/natuatuana naung mate i. Ndang porsea ahu na adong hasangapon ni naung mate martamba asing sian basa2 ni Debata tu hangoluan sogot (surgo i). Asa ndang ture mambahen manang aha utiutian mambahen hagaganda ni hasangapon ni naung mate, alai ianggo na patuduhon parsangapina sambing di na mate, manang natuatuana ra dang pola sala i ianggo di rohangku.
Ia taringot tu tanoman ni Si Naipospos i di Dolok Imun, adong do nian na mandok di Sipoholon do, hatoranganna ndang adong ia so holan ala ni na di Aek Rangat Sipoholon do maringanan Sombaon Martua Same, alai ianggo hatorangan na di Dolok Imun do ditanom, on ma: Di tingki namanghorjahon papituhalihon anakna i na dibaen (ditongos) si opat halak na tinggal di Huta Raja do pudunpudun buhul ni ari mata ni Pesta (horja) nasida i tu pinompar ni Marbun. Alai ndang dope dapot ari na tontu nasida marhite pudunpudun i, nunga dibaen (dipasaut) Sibagariang, Hutauruk, Simanungkalit dohot Situmeang horja i, alai holan ala hata ni Sibagariang do i tu anggina na tolu nari ingkon pasauton nasida mambahen horja i, nang nian ndang dapot do pe ari na jinujur nasida hian ima naung tinongoshon nasida titi ni ari tu Marbun, jala nang pe so ro Marbun dipasaut do pesta i, tarida do holan ala ni Sibagariang do umbahen na dipasaut nasida horja i, ima sian hata naginiling ni na tolu Hutauruk Simanungkalit dohot Situmeang tu Sibagariang diharoro ni Marbun, ima pasauthon pudunpudun najinalo nasida.
Songon on ma pangalahona: Dung sahat Marbun tu Huta Dolok Imun, marsogotnai ma nian mata ni horjà na manghorjahon Si Naipospos i; hape nunga diida nasida borotan ni lombu naung binorothon di alaman ni huta i, dihandanghandang i do borotan i dohot bulu na binolaan, ia torop ni handang i 90 (siapulu) kibung do, laos adong dibagasan handang i te ni lombu naung binorothonna hian jala naung tinullang i.
Dungi ro ma sungkun2 ni Marbun i tu si opat halak naung mambahen horja i mandok: “Manang na aha do alana umbahen mamintor dibahen nasida horja i so jolo dapot dope ari naung binuhul nasida hian”; alai mamintor dialusi na tolu (Hutauruk, Simanungkalit, Situmeang) do, didok ma: “Hahanta Doli Sibagariang do na so tarjua hami, sai hu jua hami do nian asa unang saut jala ingkon dung pe ro hamu nian asa pasauthon horja i, alai ingkon pasauthon do didok ibana nang so ro hamuna, asa ido alana umbahen na saut horja I”. Ndang adong be alus ni Sibagariang i, ai nunga tangkas dipaboa anggina na tolu i tois dohot jungkat ni rohana di angina naung tinonahonna jala dongan sahasuhutonna ndang diargahon janjina, diparhamuda do tahe, ndang mabiar ibana di uhum, ndang olo ibana mangoloi singot2 ni anggina si 3 halak i. Tung pangalaho namamunjung do tahe. Sipasidingon do pangalaho dohot pambahenan na songon i, tung nasojadi ulahononhon na sala situtu do i. Bursik do ro tu halak na so ingot di padan na jala na so padoshon tahi ni rohana tu donganna.
Asa dung sun nasida na manghatai, manortor ma Marbun huhut manghaliangi borotan naung hinandang i, laos martonggotonggo ma ibana mandok: “Ala naso uhum jala nasodung masa do na binahen ni Sibagariang, Tung gabe manortori te ni lombu na binorotan na i ahu umbahen na ditonahon, asa ia na sa i toropni handang namanghandang borotan dohot te ni lombu i, holan nasa i ma torop ni pinomparna, ima tonggotonggoku, sai martinangi marbinege ma ho sahala ni Si Naipospos”, ninna.
Molo hinilala jala pinartirnbanghon torop ni dongan Hutauruk, Simanungkalit dohot Situmeang, tung saut do antong tongotonggo ni Marbun i, ai ro di taon 1902 hira so lobi do ripe ni Sibagariang 90 ripe. Asa nang nidok manginona do sala ni ama, ompu tu pinomparna ianggo pinompar ni Sitoga Marbun napinaotooto na i tung torop do laos margoar do Marbun sese dibaen toropna. Alai dung na tinopotan ni Sibagariang sala na binahen ni Sibagariang najoloi, tar lam ganda do nian toropna.
Alai mardomu muse tutu, sude na lima marga i nunga masi sesaan dosa di Sipoholon, di jolo ni kantor ni Ass Demang di taon 1933. Mansai ringkot situtu do na manopoti sala na binaen ni natuatua tu donganna, asa olo iba dapotan pasupasuan nang sian Debata. Dung partangiangan na di Sipoholon i, sai tarhusungkun do angka dongan sapartangiangani ima Hutauruk, Simanungkalit, Situmeang dohot Marbun, manang na adong do panghorhon ni punguan partangiangan na binahen i, jadi sude do nasida mandok: “Marguna situtu do ai tung mansai godang do sihalashononhon basabasa ni Debata dung partangiangan i.”
Ianggo Si Raja Naipospos (Antar Sabungan Hutauruk; editor) i, na ginjang do rohana, ima huroa turun tu roha ni Sibagariang ujui. Ai di nasahali di namargondang ibana di Banuarea uju marhuta ibana disi. Ala na di ibana sian dolok Imun sahat tu Banuarea jadi di nanaeng manortor i ibana dipangido ma tu partaganing i asa dibahen gondang ni na bongbong di jae jala nabongbong di julu, jadi dibahen pagonsi i ma gondang i jala laos manortor ma ibana, nang tanganna pe antong dipatuduhon ma tu natorop diatas ni uluna songon namangap do dibahen, ima na mambahen tangan na i tumimbo dao dipadenggal jarijarina i sian uluna i, ianggo tarnaserep jala denggan ndang tama bahenon tumimbo tangan niba sian ulu, molo tumimbo dibaen na mandok (paboahon) tu natorop i do i, ndang adong be diginjang ni sangapna na sapunguan i.
Ia dung diida pinompar ni Si Toga Sobu tortor ni Antar Sabungan Hutauruk i, martahi ma nasida manuhar (pabungkashon). Jadi di sada borngin dibahen nasida ma hamusuon, jadi laos buhar borngin do Si Antar Sabungan Hutauruk i sian huta Banuarea i, jadi laos torus ma antong rasi rasa sadarion tano Banuarea i di pinompar ni Si Raja Sobu, ndang holan i tahe, na sahat do nuaeng ro di parbabokan dohot Siualuompu. Asa godang do mago digomak halak ugasan ni siginjang roha. Aut serep roha dohot tortor ni Si Antar Sabungan Hutauruk i da hot do tano Banuarea torus tu Sipohobon di ibana? Asa serep ni roha i gabe pahothon parugasanon niba hian, jala ginjang ni roha manghorhon mago parnampunaon, ima songon na tu Si Antar Sabungan Hutauruk i jala nang godang arta niba ndang jadi haginjanghononhon unang gabe mago. Namardomu do on tu sipaingot na sian hata ni Debata: Dialo Debata do angka na ginjang roha.
Panghalahala do si Antar Sabungan Hutauruk i didok jala nang na so hea diula isara tano manang adong tanda ni parugasanonna, molo marsalisi (pagulut) na obo do ibana gomos situtu mandok na ugasanna (tanona) isara tano, pola ro di na mate ibana dipikiri alona tung songon na olo do; songoni ma nang diparhalohan ni tano. Alani angka pangalaho na songon i ma gabe sogo ma antong roha ni halak manganghupi saparbabohan di parhaumaon. Sipata olo do balokna munsat asal unang diparbalok ibana, asa dao ma antong diroha ni hombar balokna i sian ibana. Hinorhon ni angka pangalaho na songon i molo adong halak manungkun nabungkas nagkining dipaboa ibana ma antong pangalaho ni si Antar Sabungan Hutauruk i, jala ihut ma hatana mandok: “Santipul so donganan do, samponggol soangkupan si Toga Naipospos”.
Si Antar Sabungan Hutauruk rasi rasa sadarion sai ehet do pandohan i, alai tutu adong do na mandok ala ni garangna, ndang apala hinaporseaan i ai pandohan sogo ni roha do pandohan i, hata sogo ni roha sambing do i bulus. Asa sai hata na sintong ma nidok nang tu dongan asa las roha ni dongan manganghupi iba, tung pinadao ma gabus nang angkalangkal pe.
Songon naung hutaringoti, taringot tu anak ni Si Toga Naipospos lima do jala adong do na mandok dua do, ianggo olat ni tingki namanuraton tu dua dope sinurathon di tarombo, alai tung sai godang do na mangalo (manjua). Asa molo tung adong dipudian ni ari rapot hadomuan ni pinompar ni Si Toga Naipospos na naeng pasadahon nang tu roha ni natorop ra pingkiranhu dibahen apala husurati taringot tusi. Alai ianggo mangihuthon timbangan ni rohaku nian sumintong do lima anak ni Si Toga Naipospós i.
Jadi laos mardomu dope taringot tu si Raja Naipospos (parianakhononna) 1 .Donda Hopol, 2. Donda Ujung, 3. Ujung Tinumpak, 4. Jamita Manganraja 5. Toga Marbun.
Tarida sian torop ni ianakhon na i, boi ma dohonon jolma na gabe do si Toga Naipospos i. Na marlapatan do goar ni anaknai sude dirohana:
Sibagariang (Donda Hopol), asa masihopolan tondina dohot tondi ni angka Anggina, jala sahala hadumaon ma i didok.
Hutauruk (Donda Ujung). jala sahala habeguon ma i didok, huhut masioloan dohot hahanggina.
Simanungkalit (Ujung Tinumpak), jala sahala panggalangon mai didok, jala parhata sioloan.
Siturneang (Jamita Mangraja), sahala harajaon ma i didok jala sipatangitangion.
Toga Marbun, jala sahala hagabeon mai didok jala sipatimbotiboon.
Dipudi ni Surat on ma angka hatorangan ni angka goar2 dohot marga ni pinonipar ni Si Toga Naipospos i, ima mangihuthon angka tona2 (barita2) ni angka na parjolo tubu. Ndang adong ianggo pustaha manang buku sian nasida, asa sintong ni nasotartontuhon dibagasan buku on, sae ma asa adong do marhite sian on panimbangion ni na manjaha dohot na umbegesa.
No. 9, Ianggo taringot tu na margoar Donda Hopol jala Sibagariang i ma songon naung pinaboa i, sahala hadumaon didok. Na gogo jala na padot do ibana, asa tung asing do burju ni i sian angka angginai mangula, ndang apala diringkoti rohana marjuji, ai ianggo nahinan nian ndang pola ulaon na so ture namarjuji ndang apala songon ditingkion ingkon adong pangkat asa marsangnap jolma, nang namangula ndang pola ulaon partoru i, gariada tahe uloaon on denggan do. Na umbolak do haumana sian hauma ni angka anggina, jotjot do longang roha ni angka anggina i dohot halak na marnida di gogona dohot balok ni haumana, jadi ia adong halak manungkun manang na beha dibahen mangulai hauma na i, mardomu tingki i mansai maol situtu ula2 bosi ima panggu, hudali dohot rambas (sasabi), jadi dialusi na mandok ma hata ni na mariungkun ondeng: songon i do sai digariangi ninna. Asa marhite sian pangalahona i ma umbahen laos margoar ibana Sipanggariangi Alai tutu ido bangkona olo do laos dipadenggan halak manjou goar ni donganna lumobi molo laos ulaon na denggan ulaonna, alai molo ulaon na hurang denggan olo do laos diparoaroa halak. Asa na lam dipadenggan angka na mandok nama goar Sipanggariang i gabe Sibagariang, nados do i ndang pola marimbar i dohonon manag jouon.
No. 10. Ianggo taringot tu Donda Ujung jala na marmargahon Hutauruk songon on do: Dung hona lele nasida rap dohot amana na Sian tano Banuarea i jala tinggal maringanan jolo di Pañsinaran Sipoholon, sian i mulak ma muse tu Dolok Imun, martahi ma muse nasida asa munsat be mangalului tano nanumapu alai ianggo ibana ndang lomo rohana munsat ai parpudi do ibana laos tinggal di huta i, alai nunga sai dibagsan muruk ibana ala so olo dongan na i tinggal disi donganna. Nang pajumpang ibana dohot donganna nunga sai muruk2., jadi alani i digoan dongan na i ma ibana parhuta Naburuk. Dungi dilaonlaon ni ari lam dipadenggan na manjou ma goarna i gabe Sihutauruk (Hutauruk) bangkona ma i antong ndang ture pangalaho na matuluthu jouon (dohonon) ai na gabe mangharungkaj tihas ni dongan do iba disi jala na mangalap muruk dohot sogo ni roba, dumenggan do pinadenggan manjou goar ni dongan, asa namanjou goar ni dongan na pahansit rohana ai las ma rohana mida iba jala lambok ateatena. Asa songoni ma pangalahona umbahen na gabe Sihutauruk (Hutauruk) marga nasida pinompar ni Donda Ujung Ala ni sahala habeguon di ibana, ndang dihabiari pinompar ni Siraja Sobu, mamintor ibana ma marbalokhon Siopat Pusoran ima na di Sipoholon.
No.11. Ianggo na margoar Ujung Tinumpak na gabe margoar jala mar-margahon Simanungkalit songon naung tinaringotan sahala panggalangon, tung na maila situtu do ibana molo ro tamuena so denggan (tabo lompanna) bahenonna, ala ni panggalangon na i ndang adong mian pahan­pahananna nang manukna, ibana pe antong tarringgas do tu huta ni halak sorang, na olo do ibana mambuat manuk ni halak dohot manuk ni donganna sahuta jala ditambathon ma i tu nabuni, ndang ianggo holan na laho panganonna sambing umbahen na dibuat alai tung holan na managam tamuena sambing do. Asa jotjot do mate nabinunihon na i ianggo soadong ro tamuena. Sipata ala na so diingot patudukhonsa jadi ala malena sodaong tuduhonna laos mate alit ma. Jadi sai adong ma naumboto pangalahona i ima siala manuk na mate maralitan, jadi digoari halak ma ibana parrnanuk na a!it laos dijou ma goarna Simanuknaaalit alai dilaonlaon ni ari gabe Simanungka!it ma. Ndang denggan nian pambahenan na songon i ai gabe agoan do halak dihorhon pambuaton songon i ba dumenggan do ulahononhon mangabehon tu dongan humurang asa unang gabe roa goar, jala bias2 do halak na mambuat naso ugasanna jala manghorhon goar tihas do na mangulahon songoni. Ndang tihas manang aha ulaon na manjalahi ngolu asing sian na mambuat naso ugasanniba. Asa songoni umbahen Ujung Tinumpak i, gabe marmargahon Simanungkalit.
No. 12. Janggo taringot tu goar Jamita Mangaraja gabe marmargahon marga Situmeang, sahala harajaon do sahalana. Na pos do roha ni donganna di ibana sipajopan (sipalumean) Alai nian molo sipalumean holan na pajophon (manimpan) sambing do palumeani disi ndang ianggo na gabe pakeonna i ianggo so jolo gabe dipangidohon ndang denggan pakeonna sambing.
Alai ianggo Situmeang i jotjot do dipake ibana sipalumean na tu ibana i. Di nasahali manortor do ibana di sada horja, dipake ma antong talitali na pinalumehon ni donganna tu ibana, tongon dohot ma mainondur nampuna talitali na pinakena i, ro ma sungkun2 manang na sian dia paheanna i, jadi dipaboa nampunasa i ma: Sipalumean do i tu ibana. Na malo do ibana manortor torop do halak mamuji mardomu tu paheanna i sai disungkuni painaonduri do. Sai adong do na naeng paroa goar ni donganna, gabe didok ma: Sipalumean goarna, alai dipudian ni an dipadenggan namanjou ma goar i Situ meang, asa songon goar tihas hian do goar Sipalumean i. Ala ni i ndang jadi baenon songon ugasanniba sandiri ugasan sipajopan ni dongan tu iba, ai mangabap (manghorhon) goar tihas do i, dumenggan ma hinasabamhon mamake paheanniba sandiri asa dao sian iba goar tihas, Denggan do nian nang pinake pahean ni halak napinapinjamhonna tu iba, alai ingkon jobo pinangidohon.
No.13. Ianggo taringot tu goar Si Marbun na laos goarna do dimargahon pinomparna paima adong marga dibahen nasida. Sahaba hatoropon na marbunbun ,do sahalai. Adong do na mandok, ia Marbun i tung nagogo do ibana mangarambasi angka ramba ima sibaenonna gabe napu tu haumana, ai napu2 ni pinahanna ndang sae tu haumana diroha, mardomu ma ala na so diloas donganna mambuat napu ni horbonasida, ima songon naung husurathon di alaman 55 i pambahenan ni Sibagariang dohot donganna tu ibana. Songon na so siat do barita ala nian papungupungu sirabun umbahen margoar si Marbun i hian, dungi ndang adong parmuba ni goar sahalana i tu goar marga i holan ala ni na diponggol nama pajempekhon dohonon manang jouon, gabe si Marbun ma marga ni pinompoarna, ai marbunbun do songon dolok antong nasida, boe dohonon sian topi Tao Toba sahat tu topi Laut Barus, sai marbunbunbunbun angka luat diingani nasida ima Negeri Bakara, Pollung, Sipituhuta, Sihikket, Tanggaran dohot Marbun Sehu. Tung basa do Debata mangalehon tu nasida hombar tu goar sahala i. Balos ni nahansit i gabe Debata do mangalehon basabasa, asa unang pola maundukhu roha ni napinasiaksiak ni donganna, pos ma rohana na sun gogo do. Debata mambahen singkatna tu ibana. Asa ndang pola sai baloson nahumurang nabinahen ni dongan tu iba, ai diboto Debata do i, sae ma pinasahat tu Ibana.
Ta taringot tu barita ni No. 9 – 13 i, umbahen na gabe marga i, songon on do didok: Ia Sibagariang i molo marbada ibana dohot alona sal manggariangi do jadi laos dibahen halak ma goarna Sipanggariang. Ia Si Hutauruk jotjot do ibana marpidong, jala jotjot dapotsa pidong Siburuki, alani i dibahen halak ma goarna Parsiburuk, dipadenggan namanjou ma i muse si Hutauruk. Ia Simanungkalit parjuji-juji do ninna, jadi jotjot ma ibana monang hinorhon ni bulung na di ibana sai galit jadi dibahen halak ma goarna Parbulung nag alit, dipudi ni ari muse dipadenggan angka na manjou ma Simanungkalit. Ia Situmeang, sai dipaingotingot do ninna lompan na di geangeang, jotjot do dibahen ibana sidalianna asa mulak tu huta sian tongandalan nang rap dohot donganna., hape holan na mambuat jala manganhon nadibagasan hudon na adong di geanggeang i, ima lompan na adong disi, jadi dibahen halak ma goarna Sipanggeanggeang dungi dipudian ni an muse dipadenggan na mandok ma goarna Situmeang.
Ia si Marbun, na dungo do ibana hehe jala jotjot do ibana hunduihundul di alaman manogot i, ndang dihabiari na ngalian hinorhon ni ombun i, jadi ala ni panaononna di ombun i dibahen halak ma goarna Panaon Ombun, dipudian ni an muse dipadenggan ma gabe si Marbun. Alai songon naung hutaringoti di jolo ni surat on. ianggo goar si Toga Marbun na gabe marga Marbun ndang adong muba i, boi do dohonon ndang tulus barita on tu ibana. Songnima barita II taningot tu angka marga i, alai nang pe husurathon on asa tung ditimbangi angka nanaeng mambotosa do manang na dia na sumintong, holan on songon na jumonok do ra nian hinorhon ni hatorangan na di No. 9, 10, 11, 12 dohot 13 i. Ra malo mandok padomudomu pangalaho na gabe goar tiarna ianggo barita on. Asa molo adong ringkot ni angka baritaon muse dilaonlaon ni ari, tumangkas ma dibahen partimbangan taringot tusi.
No. 14. Taringot tu Parnampunaon tano ni Naipospos.
Huboto do nian na lam sosa do gadu jala lam mumpat do tuhe ndang sai ingoton parnampunaon ai sipata gabe na hurang ture. Asa nang hupatorang pe taringot tu parnampunaon di bagasan buku on ndang pola adong sangkaphu asa sai tongtong marga Naipospos nampunasa, lumobi muse apala di tingkion Indonesia nunga merdeka, gabe sapangkilalaan jala sada bangso nama Indonesia. Antong ndang denggan be sai dohon on tu dongan ndang boe ulaonna tano ni iba hian, ianggo leak so tarula iba be tibu rupani, alai ianggo tu pangaradeon (persediaan) na hatop nama ba jadi do ianggo songoni, alai ianggo holan late ni roha do, unang ma sai dipangasahon ala ni parnampunaon.
Asa songon on ma parnampunaon ni Naipospos di partanoon:
Luat Huta Raja, Luat Sipoholon, Hutauruk, Simanungkalit, Situmeang, Luat Rura Julu (Janjiraja), Luat Siantar Naipospos torus tu Sihunik (Pearaja) sahat tu topi laut (Sibolga), asing dope parnampunaon ni dongan Marbun na mangingani tario Marbun. Ia parbalohanna ianggo nahinan nian Punsu ni Dolok lmun do tu Jorbing Nabolon tu Hau Sisada­sada di Sibual tu Duan Sapang, alai nunga leleng i jala nunga diingani si Toga Sihombing i rasisrasa sadarion. Dipudian ni ari ditolon Ompu Tuan Jujur Naiborngin ma nang mual tabar dohot tano Paniaran, jadi sian Jorbing Dolok Imun nama nian tu Siamporik tu Bintatar Nabolon ditopi aek Butar hian do i di saba Paniaran; nahinan sian i ma tu Pangaloan Paniaran sian i tu Haumapea balok ni Sitabotabo siani tu Tangga Sihalung di lobu Siregar nama i, sian i mulak dompak hasundutan tu Ambar Nalonglong di Bahal Batu, sian i tu Najangguton, sian i tu Dolok Nagodang, Sialagundi Nasoramate ma tuhena disi, na sian paniaran sahat tu Najangguton nunga marga na asing nampunasa hira so tarida be panginganion ni marga Situmeang nang di tano Bahal Batu. Sian Dolok Nagodang tu huta ni Simarsagasaga holang2 Pagarsinondi dohot Huta Raja sian Sanggar Nasoramate mandapthon Holbung bagas ma i siani tu Sibadak Nabolon sian i tu Danotano ditombak marbalokhon Hutabarat, sian i tu Peanajagar Rura Silindung, sian i tu Dolok Panatapan sian i tu Piangin Nabolon dipunsu ni dolok Siatas ma i sian i tu Kolang torus marbariba aek tu Laut Sibolga.
Ia dii utara sian Dolok Imun satonga tu aek isa Sampuran Siangir, sian i tru aek Simallobuklobuk di Sisordak ma i sian i tu Gorat Naholon di Huta Tinggi hian, sian i tu Batu Pargajaan di robean ni Sandaran mai sian i tu Andor Sisuruksurukon ditambak ni Rurajulu ma i sian i tu Pearaja Sihunik ma i torus tu topi Tao Sibolga Barus ma i songon ima ianggo najolo didok angka natuatua parjolo i Mardomu tu hataku dison ndang na gabe asa adong parningotan lao mangarangara halak laho mangula alai asa songon barita2 nama dirohangku di angka naumposo, alai tutu na boe do i gabe patambahon tu siingoton manang sipikiran laho mambahen tu ulaon nadenggan.
Antong sai manghorhon na denggan ma na hutaringoti on bahenon ni marga Naipospos nian, ia partbalohan parpudi sahalai boi dohonon ianggo Huta Raja masi ihuthon ugasan (tano na) be nama (diula be do tano na) ai sian Pilar S No. 84 dipunsu ni Dolok Imun torus dohot Gurat Natigor tu Sirpang Butar Siborongborong moru 100 M tu dangsina siani tu Huta Lumban Rang Bahal Batu sian i Sitandiang tu Dolok Nagodang tardok diihuthon do ugasan na be, songn ido nang balok Butar Bahal Batu pe, Ia adong pe tano langlang sasaotik tarsongon dosniroha na be nama i bahen panjampalan ni pinahan huhut paima adong namambuat hombar tu parturena be.
Nang sian dolok Imun dompak hasundutan tarsuang songoni, ima na marbalokhon Sibaragas dohot Huta Tinggi asing ma rupani na masionjaran sasaotik di angka parbalokan.

Huta Raja, 20 – 9 – 1955.
dto

(R.H.O.B . S. Sibagariang)

Ultah Shiny ke 2 tahun

Ulang Tahun Shiny yang ke 2 tahun tgl 29 Agustus 2009
Selamat Ulang Tahun ya Nak